Policia e Vlorës ka arrestuar në flagrancë një 22-vjeçar në fshatin Dhërmi, për shitje të lëndëve narkotike dhe mbajtje pa leje të armëve sportive.

Sipas njoftimit zyrtar, gjatë kontrollit të një automjeti, drejtuesi i tij, shtetasi Justino Kurti, u kap me disa doza kokaine të gatshme për shitje. Në automjet u gjet gjithashtu një pistoletë sportive me municion dhe silenciator.

22-vjeçari u arrestua për veprat penale “Prodhimi dhe mbajtja pa leje e armëve të gjuetisë dhe sportive” dhe “Prodhimi dhe shitja e narkotikëve”. Dozat e kokainës dhe arma u sekuestruan si prova materiale, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.