Deputetja e Partisë Demokratike, Ina Zhupa, nga foltorja e Kuvendit akuzoi mazhorancën socialiste se po përgatit ndryshime të njëanshme në rregulloren parlamentare, me qëllim përgjysmimin e kohës së të folurit për deputetët e opozitës.

Sipas saj, kjo lëvizje vjen si kundërpërgjigje ndaj një vendimi të mëparshëm të Gjykatës Kushtetuese, që i dha të drejtë opozitës për kohën e nevojshme për diskutim. Deputetja tha:

“Zoti kryetar, keni fobi nga fjala e opozitës, e keni tmerr, keni numëruar ato minutat tona të sesionit të kaluar dhe ju ka hequr vërejtje kryeministri… vazhdoni në mënyrë të njëanshme të propozoni ndryshime në rregullore… Thelbi i ndryshimeve është të godasësh pikërisht atë që rrëzoi Gjykata Kushtetuese: lirinë e shprehjes së deputetit, hapësirën e deputetit për të thënë të vërtetën, për të denoncuar korrupsionin qeveritar, për të kërkuar llogari.”

Ndërhyrja e Zhupës u ndërpre disa herë nga drejtuesi i seancës, i cili theksoi se çështja e ndryshimeve nuk ishte në rendin e ditës, por deputetja këmbënguli se mazhoranca po synon të kufizojë në mënyrë drastike hapësirën e opozitës, duke e cilësuar këtë si një sulm ndaj demokracisë parlamentare.