Grupi kriminal i Inez Hajrullës, me bazë në Vlorë, i goditur pak ditë më parë nga SPAK, dyshohet se përdorte sistemin financiar informal “Hawala” për të transferuar paratë e përfituara nga aktivitetet kriminale.

Hetimet bazohen në të dhënat e siguruara nga komunikimet në aplikacionin e koduar Sky ECC, ku u zbardhën edhe dy vrasje të ndodhura më parë. Hetuesit e konsiderojnë Hawala-n një metodë të sofistikuar për transferimin e parave, që përfshinte pagesa për aktivitet kriminal dhe financimin e blerjes së lëndëve narkotike në Amerikën Latine, me shumat që mund të depozitoheshin në një shtet dhe të tërhiqeshin në një tjetër, përfshirë edhe Shqipërinë.

SPAK po heton edhe pasuritë e 8 personave ndaj të cilëve është vendosur masa e sigurisë “arrest në burg”, prej të cilëve tre masa janë ekzekutuar deri tani. Hetimet kanë mundësuar zbardhjen e vrasjeve të Gentian Qarri dhe Bledar Birçaj, ndodhura në vitin 2021 në Vlorë.

Përveç këtyre, anëtarët e grupit dyshohen për përfshirje në katër tentativa për trafik ndërkombëtar droge, që përfshijnë mbi një ton kokainë dhe rreth 700 kilogramë kanabis.