Botuesi i Report TV, Carlo Bolino, ka vendosur shkarkimin nga puna të gazetarit Ilir Babaramo, drejtues i emisionit “5Pyetjet nga Babaramo”.

Vetë Babaramo ka treguar se njoftimi për pushimin erdhi në orët e vona të mbrëmjes nga pronari i televizionit. “Dje në orët e vona të mbrëmjes pronari i televizionit më ka telefonuar për të më komunikuar pushimin nga puna”, tha gazetari.

Ai shtoi se i ishte komunikuar një mesazh i qartë: “Nuk pranoj që të punosh për mua dhe të kritikosh qeverinë, përsëriste pa pushim”.

Babaramo u shpreh gjithashtu mirënjohës ndaj publikut dhe bashkëpunëtorëve: “Në këtë udhëkryq timin profesional dua të falënderoj të gjithë ata që besojnë se e vërteta nuk ka çmim. Bashkëpunimi im me televizionin Report TV është ndërprerë në mënyrë të njëanshme”.

Shkarkimi i tij ka shkaktuar reagime në opinionin publik, duke ngritur debate mbi lirinë e medias dhe rolin e kritikës ndaj pushtetit në Shqipëri.