Drejtësia angleze ka dhënë dënim të rëndë për një çift që u shpall fajtor për vrasjen e djalit të tyre tre muajsh, një ngjarje që tronditi opinionin publik në nëntor të vitit 2024.

Shqiptari Klevi Pirjani, 37 vjeç dhe partnerja e tij portugeze, Nivalda Santos Pirjani, 35 vjeçe, pretenduan fillimisht se foshnjës i ishte ndalur frymëmarrja. Por ekzaminimet mjekësore në spitalin pediatrik zbuluan një realitet shumë më të rëndë, me frakturë në kafkë dhe dëmtime të shumta të tjera të shkaktuara në periudha të ndryshme.

Pavarësisht përpjekjeve të mjekëve, foshnja ndërroi jetë pesë ditë pas shtrimit në spital. Hetimet zbuluan se lëndimet nuk ishin të rastësishme, por pasojë e dhunës së përsëritur.

Pas gjyqit të zhvilluar në tetor, të dy u shpallën fajtorë për vrasje, shkaktim ose lejim të vdekjes së një fëmije dhe për lëndim të rëndë trupor. Sipas vendimit të gjykatës, Klevi Pirjani u dënua me 19 vite burg, ndërsa Nivalda Santos Pirjani me 15 vite e tre muaj.

Autoritetet theksuan se çifti nuk dha asnjë shpjegim për dhunën e ushtruar ndaj foshnjës. Prokuroria nënvizoi se fëmija ishte plotësisht i varur nga prindërit për çdo nevojë jetike dhe se ata jo vetëm që nuk e mbrojtën, por u bënë shkaktarë të vdekjes së tij.