Gazetarja Ambrozia Meta ka rrëfyer një episod të fortë nga koha kur ishte studente dhe kryente praktikën pranë medias Shqiptarja.com, në pronësi të Carlo Bollino, duke hedhur akuza për një situatë të papërshtatshme brenda redaksisë.

Në një postim në Facebook, Meta kujton se si një pasdite, Carlo Bollino kishte hyrë në redaksi me një grumbull gazetash dhe i kishte përplasur me forcë mbi tavolinën e një gazetareje. Sipas saj, më pas ai iu drejtua me tone të ashpra dhe fyerje kryeredaktorit, për shkak të hapësirës që i ishte dhënë një lajmi.

Momenti që e ka shënuar më shumë, sipas gazetares, ka ndodhur pasi ai u largua nga redaksia. “Kur u largua… kolegia ngriti gazetat që ai i kishte hedhur me përçmim dhe pa syzet e saj të thyera. Ishte momenti kur u betova që nuk do të punoja kurrë me atë botues”, shkruan Meta.

Ajo thekson se ky episod i është rikthyer në vëmendje së fundmi, pasi ka parë një rast tjetër që lidhet me largimin nga puna të një gazetari, duke e lidhur me mënyrën se si, sipas saj, disa pronarë mediash e konceptojnë pushtetin dhe marrëdhënien me punonjësit.

Në përfundim, Meta nënvizon se nuk bëhet fjalë vetëm për lirinë e medias, por edhe për mentalitetin drejtues, duke shtuar se askush nuk duhet të ndiejë se “fati i tij është në dorën e dikujt tjetër”.