Rreth 31 kallëzime penale pritet të dorëzohen në Peja ndaj mbi 200 personave të dyshuar për manipulim të rezultateve zgjedhore për kandidatët për deputetë në zgjedhjet e 28 dhjetorit.

Lajmi është konfirmuar nga zëdhënësi i Prokurorisë Themelore në Pejë, Shkodran Nikqi, i cili bëri të ditur se hetimet lidhen kryesisht me ndërhyrje në procesin e numërimit dhe evidentimit të votave.

Sipas informacioneve paraprake, në mesin e të dyshuarve janë kryesues dhe komisionerë të përfshirë drejtpërdrejt në administrimin e procesit zgjedhor.

Raste të ngjashme janë evidentuar edhe në disa komuna të tjera të Kosovës, përfshirë Prizren, Malishevë, Gjakovë dhe Drenas, ku disa komisionerë dhe zyrtarë zgjedhorë janë arrestuar ose marrë në pyetje.

Autoritetet po vijojnë hetimet për të zbardhur plotësisht skemën e dyshuar të manipulimit, ndërsa pritet që çështja të ketë zhvillime të mëtejshme në ditët në vijim.