Ministria e Inteligjencës e Iranit njoftoi sot arrestimin e 39 personave në Teheran, të cilët konsiderohen “anëtarë të grupeve terroriste dhe mercenarë armiqësorë sionisto-amerikanë”.

Sipas një njoftimi të ministrisë, 27 prej tyre ishin pjesë e dy grupeve separatiste dhe synonin të krijonin një celulë operative në provincën Sistan dhe Baluchistan, në juglindje të vendit, me qëllim nxjerrjen e pasigurisë. Operacionet bënë të mundur arrestimin e tyre para se të kryenin ndonjë veprim.

Gjatë kontrollit u sekuestruan 49 eksplozivë të improvizuar, 2 pushkë sulmuese Kalashnikov, 16 pistoleta, 50 karikatorë dhe mbi 1,500 fishekë, si dhe 7 pajisje Starlink për akses satelitor interneti.

Ndër të arrestuarit, disa dyshohen për përpjekje për destabilizim psikologjik në hapësirën kibernetike, ndërsa të tjerët për dërgimin e informacionit mbi pozicionet e forcave të sigurisë dhe ushtarëve te “armiqtë”.

Që nga fillimi i tensioneve me Shtetet e Bashkuara dhe Izraeli, Teherani ka raportuar arrestimin e qindra personave të akuzuar si mercenarë ose agjentë të vendeve të huaja.