Irani ka lejuar kalimin e anijeve jo armiqësore përmes Ngushticës së Hormuzit, e cila ishte mbyllur më parë për shkak të sulmeve izraelite dhe amerikane. Raportohet se disa anije nga Kina, India dhe Pakistani tashmë po përdorin këtë rrugë ujore strategjike, me pagesa që arrijnë deri në 2 milionë dollarë për transit.

Megjithatë, Teherani ka refuzuar të pranojë pretendimet e presidentit amerikan, Donald Trump, për negociata të afërta për një marrëveshje paqeje, duke deklaruar se “SHBA po negocion me vetveten. Ne nuk do të pajtohemi kurrë me ju”, sipas një zëdhënësi të ushtrisë iraniane. Një burim iranian i tha CNN se Teherani është i gatshëm të dëgjojë propozime “të qëndrueshme” për t’i dhënë fund konfliktit.

Trump, nga ana e tij, u shpreh në Shtëpinë e Bardhë se Irani e dëshiron shumë një marrëveshje dhe se vendi i ka dhënë SHBA-ve një “dhuratë shumë të madhe, me vlerë të jashtëzakonshme”. Ai shtoi se mund të konsiderohet “ndryshim regjimi” dhe se “e kemi fituar këtë luftë”, duke pretenduar se Irani ka rënë dakord të mos zhvillojë kurrë armë bërthamore.

Lajmet për avancimin e negociatave dhe hapjen e Ngushticës së Hormuzit ndikuan menjëherë në tregjet e energjisë, me çmimin e naftës që ra mbi 5%, duke u ulur në 94.42 dollarë për fuçi.