Pas vendimit të Gjykatës së Lezhës që dënoi Ruben Saraivën me burgim të përjetshëm për vrasjen e biznesmenit Ardian Nikulaj në Shëngjin, familja e të ndjerit ka reaguar për herë të parë.

Në një deklaratë, ata shprehen se kishin pritur këtë vendim dhe e konsiderojnë si një hap përpara drejt drejtësisë: “Barbaria e ekzekutimit me gjashtë plumba të Ardianit nga i dënuari drejtësisë shqiptare sot Ruben Saraiva, është një plagë që nuk do të mbyllet kurrë, posaçërisht për fëmijët e Ardianit që po rriten pa ngrohtësinë e babait të tyre.”

Familja gjithashtu shpreh dhimbje dhe shqetësim për faktin se personat britanikë, të cilët kishin ardhur në hotelin e Nikulajt me qëllim për ta survejuar dhe më pas u lidhën me ekzekutorin Saraiva, nuk kanë përballur ende drejtësinë shqiptare. “Ne jemi mirënjohës për oficerët e Policisë së Lezhës dhe Interpol Tiranës për ekstradimin e Ruben Saraivës nga Maroku, por shqetësimi ynë mbetet për vonesën në ekstradimin e të pesë të arrestuarve në Angli që dyshohen të jenë përfshirë në vrasje,” thanë ata.

Familja Nikulaj thekson se drejtësia e plotë nuk do të arrihet pa zbardhjen e rolit të urdhëruesve dhe financuesve të krimit. “Vetëm kur të dalin përpara drejtësisë, do të ketë qetësi për familjen dhe drejtësi për Ardianin,” përfundon deklarata.