Policia ka ekzekutuar 9 nga 11 masat e sigurisë “Arrest në burg” në kuadër të operacionit të koduar “Night Clubs”, që goditi shpërndarjen e drogës brenda lokaleve të natës në zonën e Ish-Bllokut në Tiranë. Dy të tjerët janë ende në kërkim.

Të arrestuarit janë: Enis Haxhiaj, 39 vjeç; Akil Ndreu, 37 vjeç; Klevis Maqellari, 30 vjeç; Raul Loka, 29 vjeç; Endrijus Shaliu, 34 vjeç; Ergi Hasani, 26 vjeç; Migert Balla, 31 vjeç; Arli Gjokmeli, 36 vjeç; dhe Fradjo Keli, 32 vjeç.

Gjithashtu, në flagrancë u arrestua Orges (Dritan) Jahelezi, 49 vjeç, për shkelje të masës “Arrest në shtëpi”. Gjatë periudhës hetimore, u arrestuan edhe dy persona të tjerë, E. L., 42 vjeç dhe B. L., 59 vjeç, të cilëve iu sekuestruan 2200 tableta ekstazi (MDMA).

Policia njofton se hetimet zbuluan se këta shtetas, punonjës ose administratorë të lokaleve, shpërndanin doza droge të forta brenda ambienteve të natës. Gjatë kontrolleve, u sekuestruan doza droge të dyshuara si kokainë dhe 11 aparate celularë, si prova materiale.

Operacioni vijon, ndërsa dy persona janë ende të shpallur në kërkim.