Një ngjarje e rëndë është regjistruar në zonën e Lungomare, ku një pronar lokali është dhunuar nga tre persona ende të paidentifikuar.

Sipas informacioneve paraprake, pronari i një bar-restoranti është goditur fizikisht, duke pësuar dëmtime që kanë bërë të nevojshëm transportimin e tij në spital për ndihmë mjekësore.

Ngjarja ka ndodhur në një nga zonat më të frekuentuara të qytetit, duke shkaktuar panik te qytetarët dhe turistët e pranishëm. Kanë qenë familjarët dhe dëshmitarët në vendngjarje që kanë njoftuar menjëherë policinë.

Forcat e rendit kanë mbërritur në kohë të shpejtë dhe kanë nisur hetimet për zbardhjen e plotë të rrethanave, ndërsa autorët janë larguar nga vendi i ngjarjes. Aktualisht, policia po punon për identifikimin dhe kapjen e tyre.

Ndërkohë, grupi hetimor po sekuestron pamjet e kamerave të sigurisë në zonë dhe brenda ambientit të lokalit, të cilat pritet të ndihmojnë në hedhjen e dritës mbi këtë akt dhune.