Ish-ministri Arben Malaj ka reaguar pas spekulimeve për një kandidim të mundshëm në krye të Bashkisë së Vlorës, duke lënë të hapur mundësinë për një garë si i pavarur, por duke vendosur një vijë të qartë ndarëse nga politika aktuale.

Në një reagim publik, Malaj theksoi se nëse do të vendosë të hyjë në garë, nuk do të jetë në asnjë rrethanë kandidat i kryeministrit Edi Rama apo i ndonjë force tjetër politike.

“Në asnjë rast nuk do të jem kandidat i Edi Ramës apo i ndonjë force tjetër politike”, u shpreh ai, duke nënvizuar se çdo angazhim i tij do të jetë vetëm mbi bazën e pavarësisë dhe integritetit.

Malaj bëri me dije se ka marrë kërkesa të shumta nga qytetarë dhe mbështetës në Vlorë për të konsideruar kandidimin, ndërsa shtoi se aktualisht ndodhet në një proces reflektimi dhe nuk ka ende një vendim përfundimtar.

Ai theksoi se Vlora meriton një model të ri qeverisjeje, larg interesave politike dhe pazareve, duke e cilësuar drejtimin e bashkisë si një përgjegjësi morale dhe jo një mjet për përfitime personale.

Në fund të reagimit, ish-ministri la të hapur çdo mundësi, duke përdorur shprehjen: “Kurrë mos thuaj kurrë”, ndërsa premtoi se vendimi i tij do të bëhet publik në kohën e duhur dhe me transparencë të plotë.