Kryeministri izraelit Benjamin Netanyahu ka paralajmëruar se Irani po i afrohet përvetësimit të armëve bërthamore dhe zhvillimit të sistemeve të avancuara raketore, duke e cilësuar këtë si një kërcënim serioz për sigurinë globale.

Në një intervistë për Newsmax, Netanyahu theksoi se përparimi i Teheranit nuk përbën rrezik vetëm për Izraelin, por edhe për Evropën dhe Shtetet e Bashkuara të Amerikës. Sipas tij, Perëndimi duhet të reagojë në kohë për të shmangur përshkallëzimin e situatës.

Ai vlerësoi rolin e Donald Trump, duke thënë se ish-presidenti amerikan kishte kuptuar prej kohësh kërcënimin që, sipas tij, paraqet regjimi iranian. Netanyahu rikujtoi edhe vendimin e vitit 2018 për tërheqjen e SHBA-ve nga Plani i Përbashkët Gjithëpërfshirës i Veprimit, duke argumentuar se kjo shmangu shfrytëzimin e boshllëqeve në marrëveshje nga Irani.

Në intervistë u përmend gjithashtu një incident pranë bazës ushtarake Diego Garcia, rreth 4 mijë kilometra larg Iranit, që sipas Netanyahu-t tregon rritjen graduale të rrezes së veprimit të raketave iraniane. “Nuk është ende një raketë ndërkontinentale, por po shkon drejt asaj faze”, u shpreh ai.

Kryeministri izraelit theksoi se për vite me radhë, përparimi i Iranit në programet bërthamore dhe të armëve është nënvlerësuar nga liderët perëndimorë, gjë që sipas tij ka kontribuar në situatën aktuale.

“Pyetja është nëse Perëndimi do të zgjohet”, deklaroi Netanyahu, duke shtuar se zhvillimi i këtyre kapaciteteve nga Irani ka qenë një proces i vazhdueshëm dhe i qëndrueshëm ndër vite.