Policia vijon hetimet për zbardhjen e plotë të vrasjes së 78-vjeçarit Gëzim Vija, i cili u gjet i pajetë në banesën e tij në Korçë.

Ndërkohë, dëshmitë e banorëve të zonës hedhin dritë mbi profilin e viktimës. Fqinji i tij, Simon Muço, është shprehur se i moshuari ishte një person i respektuar dhe pa probleme me askënd.

“Gëzimi ishte shumë njeri i mirë, i nderuar dhe i respektuar nga të gjithë. Nuk kishte konflikte me askënd, ishte ndër më të mirët në lagje”, u shpreh ai, duke shtuar se zona njihej për qetësinë dhe sigurinë.

Sipas tij, viktima kishte marrëdhënie të mira edhe me familjen, ndërsa djali i tij punonte si mekanik dhe e vizitonte rregullisht.

Autoritetet po punojnë për të zbuluar rrethanat e krimit dhe për të identifikuar autorin apo autorët, ndërsa deri më tani nuk ka një pistë zyrtare mbi motivin e ngjarjes.