Policia e Tiranës ka goditur një rast të trafikimit të automjeteve të vjedhura nga jashtë vendit, duke sekuestruar dy mjete luksoze me vlerë totale rreth 120 mijë euro.

Bëhet fjalë për një Audi SQ8 dhe një BMW, të cilat rezultuan të vjedhura përkatësisht në Gjermani dhe Zvicër.

Sipas hetimeve, automjeti tip Audi SQ8, me vlerë rreth 70 mijë euro, ishte vjedhur në Gjermani dhe dyshohet se është trafikuar në Shqipëri nga një 29-vjeçar me inicialet H. P., me qëllim shitjen.

Ndërkohë, automjeti tjetër tip BMW, me vlerë rreth 50 mijë euro, rezultoi i vjedhur në Zvicër dhe dyshohet se është futur në vend nga shtetasi K. B., 50 vjeç, gjithashtu për t’u shitur në tregun vendas.

Të dy personat janë proceduar penalisht, ndërsa materialet i janë referuar Prokurorisë së Tiranës për veprime të mëtejshme.

Policia vijon hetimet për të zbuluar nëse këta shtetas janë pjesë e një rrjeti më të gjerë të trafikimit të automjeteve luksoze drejt Shqipërisë.