Kryeministri Edi Rama ka reaguar përmes një postimi në rrjetet sociale lidhur me situatën e krijuar pas thirrjeve për bojkot ndaj këngëtarit Yll Limani, duke dënuar gjuhën e urrejtjes dhe kërcënimet që, sipas tij, janë shfaqur pas suksesit të koncertit të artistit.

Në reagimin e tij, Rama thekson se nuk është ndjekës i muzikës së Yll Limanit, por e konsideron të papranueshme dhunën verbale dhe presionin e ushtruar ndaj tij në rrjetet sociale.

“NUK E NJOH YLL LIMANIN. Nuk e dëgjoj muzikën e tij. Por dhunën online ndaj tij, thirrjet e dhunshme për bojkot të koncertit të tij, kërcënimet pas suksesit të mbrëmshëm, i konsideroj si shprehjen më të neveritshme të një fenomeni që po e shoqëron protestën e bulevardit”, shkruan Rama.

Kreu i qeverisë shprehet se askush nuk duhet të justifikojë apo të normalizojë sjellje të tilla, pavarësisht bindjeve politike apo pozicionimeve publike.

Sipas tij, në ditët e fundit është krijuar një klimë presioni ndaj personave që nuk zgjedhin të bashkohen me protestat apo që shprehin mendime të ndryshme.

“Po ngrihet përditë një dallgë dhune verbale, presioni dhe kërcënimesh ndaj kujtdo që nuk rreshtohet me protestuesit”, thekson Rama.

Ai paralajmëron se histori të ngjashme kanë treguar se kur një grup pretendon se zotëron të vërtetën absolute dhe përjashton mendimin ndryshe, mund të krijohen fenomene të rrezikshme politike dhe shoqërore.

“Asnjë lëvizje nuk duhet të imponojë mendimin me presion, por me argument. Kur dialogu zëvendësohet nga sharja dhe frikësimi, demokracia fillon të humbasë frymën e saj”, vijon më tej kryeministri.

Në fund të reagimit, Rama nënvizon se protesta është një e drejtë demokratike që duhet respektuar, por sipas tij ajo nuk duhet të shoqërohet me etiketime, kërcënime apo presion ndaj qytetarëve që zgjedhin të mos marrin pjesë.

Ai bën thirrje për më shumë qetësi në debatin publik, duke theksuar se Shqipëria duhet të ecë përpara përmes dialogut, respektit dhe pranimit të mendimit ndryshe.