Ministri i Drejtësisë, Toni Gogu, ka theksuar rëndësinë e konsolidimit të Reformës në Drejtësi, duke e cilësuar atë si një domosdoshmëri për forcimin e shtetit ligjor dhe jo thjesht një detyrim në kuadër të integrimit europian.

Përmes një reagimi nga Berlini, ku vizitoi Neues Museum, Gogu ndau reflektime mbi simbolikën historike të drejtësisë.

“Peshorja e drejtësisë, simboli i njohur në gjykatat tona, i ka rrënjët 4,000-vjeçare këtu, në konceptin egjiptian të Ma’at: e vërteta, barazia, rendi”, u shpreh ministri.

Ai nënvizoi se Reforma në Drejtësi nuk duhet parë vetëm si një kërkesë e Bashkimit Europian, por si një nevojë e vetë shoqërisë shqiptare.

“Reforma e Drejtësisë që po ndërtojmë nuk është vetëm kërkesë europiane. Është vazhdim i asaj thirrjeje të brendshme shumë më të vjetër dhe më thelbësore, bindjes se shteti pa drejtësi nuk është shtet”, deklaroi Gogu.

Sipas ministrit, forcimi i institucioneve të drejtësisë mbetet një nga shtyllat kryesore për garantimin e barazisë para ligjit dhe ndërtimin e një shteti funksional e demokratik.