Byroja Kombëtare e Hetimit ka ushtruar kontrolle në vilën dhe ambientet e zyrave të biznesmenit Samir Mane, në kuadër të hetimeve të SPAK për një prej dosjeve më të mëdha të trafikut ndërkombëtar të kokainës dhe pastrimit të parave.

Kontrollet janë kryer me vendim të Gjykatës së Posaçme Kundër Korrupsionit dhe Krimit të Organizuar (GJKKO), ndërsa burime mediatike bëjnë me dije se gjatë operacionit është sekuestruar edhe telefoni celular i biznesmenit, i cili pritet t’i nënshtrohet verifikimeve të mëtejshme nga hetuesit.

Ky zhvillim vjen si vijim i megaoperacionit të SPAK, që goditi tre grupe të dyshuara kriminale, të cilat sipas hetimeve dyshohet se kanë vepruar në fushën e trafikut ndërkombëtar të kokainës dhe pastrimit të parave. Në qendër të dosjes përmenden grupet e lidhura me Artur Shehun, Artur Koçekun (i njohur edhe si Luçiano Koçeku) dhe Alfredo Hamzain.

Sipas materialeve hetimore, të ardhurat e përfituara nga trafiku i drogës dyshohet se janë kanalizuar në sektorin e ndërtimit, përmes investimeve të dyshimta dhe lidhjeve me biznesmenë të ndryshëm. Në dosje përmenden emrat e Ilir Shtufit dhe Orest Sotës, si persona përmes të cilëve dyshohet se janë investuar para me burim kriminal në projekte ndërtimi.

Hetimet kanë nxjerrë në pah edhe dyshime për investime në projektin Green Coast në Palasë, një nga resortet më të njohura në bregdetin shqiptar.

Sipas burimeve hetimore, emri i Samir Manes rezulton i përmendur në materialet e SPAK, ndërsa kontrollet e kryera nga BKH në banesën dhe zyrat e tij konsiderohen një hap i rëndësishëm për verifikimin e lidhjeve, komunikimeve dhe materialeve që mund të kenë vlerë për dosjen.

Burime pranë hetimit konfirmojnë se gjatë kontrolleve janë sekuestruar pajisje dhe materiale të ndryshme, të cilat do të analizohen nga SPAK dhe BKH. Telefoni celular i biznesmenit është marrë për ekspertim, me qëllim verifikimin e komunikimeve dhe kontakteve të mundshme që lidhen me çështjen nën hetim.

Deri në këtë fazë nuk ka një reagim publik nga Samir Mane për kontrollet e kryera në vilën dhe zyrat e tij, ndërsa SPAK nuk ka dalë ende me një njoftim zyrtar të detajuar për rolin e tij në këtë dosje.

Hetimet vijojnë, ndërsa rasti pritet të sjellë zhvillime të mëtejshme në ditët në vijim.