Lidhja mes Shakirës dhe Kupës së Botës së futbollit ka hyrë edhe një herë në histori. Kënga zyrtare e edicionit të këtij viti, “Dai Dai”, e interpretuar nga ylli kolumbian Shakira në bashkëpunim me Burna Boy, është shpallur si kënga më e mirë zyrtare e një Botërori ndonjëherë.
Kjo është ajo që rezulton nga një sondazh i realizuar nga revista prestigjioze muzikore Billboard, e cila ka vlerësuar himnet zyrtare të FIFA-s që nga viti 1990.
E publikuar më 14 maj, “Dai Dai” tërhoqi menjëherë vëmendjen globale falë ritmit të saj energjik dhe mesazhit emocional. Kënga është përshkruar si një thirrje për unitet dhe forcë kolektive, duke përfshirë edhe homazhe për legjenda të futbollit si Lionel Messi, Cristiano Ronaldo, Diego Maradona, Paolo Maldini, Romário, David Beckham dhe Kaká.
Në sondazhin e hapur më 1 qershor dhe të publikuar më 10 qershor, “Dai Dai” kryesoi renditjen me 31.28% të votave, duke lënë pas “Waka Waka (This Time for Africa)” (Afrika e Jugut 2010) me 26.65%, dhe “La Copa de la Vida” të Ricky Martin (Francë 1998) me 24.73%.
Më poshtë renditen edhe këngë të tjera ikonike si “We Are One (Ole Ola)” e Pitbull, Jennifer Lopez dhe Claudia Leitte (Brazil 2014), si dhe “The Time of Our Lives” e Il Divo dhe Toni Braxton (Gjermani 2006), ndërsa klasike të tjera si “Un’estate italiana” (1990), “Boom” dhe “Live It Up” nuk arritën të kalonin 2% të votave.
Sipas analizës së publikuar, “Dai Dai” ka pasur një ndikim të menjëhershëm global, duke grumbulluar dhjetëra milionë klikime në platformat digjitale dhe duke u kthyer në një nga momentet më të komentuara të turneut.
Me këtë sukses, Shakira konfirmon edhe një herë statusin e saj si një nga figurat më të mëdha të muzikës globale, duke e lidhur emrin e saj në mënyrë të pandashme me historinë e Botërorit të futbollit.
