Parlamenti Europian ka rrëzuar amendamentin që lidhej me Sazanin dhe Zvernecin në rezolutën për Shqipërinë, duke miratuar dokumentin final me shumicë dërrmuese votash.

Pas këtij vendimi ka reaguar kryeministri Edi Rama, i cili e ka lidhur debatin për projektet në zonat e diskutueshme me dezinformimin dhe ka mbrojtur qëndrimin e qeverisë për zhvillimin e Zvernecit, ndërsa ka kritikuar sërish protestat e javëve të fundit.

Përmes një postimi në rrjetet sociale, Rama shkruan:

“Ja edhe PARLAMENTI EUROPIAN e ndau ‘shapin’ e stuhisë digjitale të dizinformimit nga ‘sheqeri’ i zonës së mbrojtur Vjosë-Nartë, e cila nuk ka asnjë lidhje me zhvillimin që europarlamentarët e rrëzuar me votën e shumicës dërrmuese, futën gorrazhi si amendament të Rezolutës për Shqipërinë.

Tani o është çmendur dhe korruptuar krejt Europa, që përmes Parlamentit të saj e vlerëson lart Shqipërinë dhe nxit anëtarësimin tonë sa më parë në BE, o ka diçka që nuk shkon me ata që e nisën protestën e javëve të fundit me mbrojtjen e flamingove dhe po e bitisin si luftë për pushtet në emër të flamingove!

Në çdo rast flamingot do të mbrohen, Vjosë-Narta do të mbrohet, Zverneci do të zhvillohet bazuar në një Vlerësim të Ndikimit në Mjedis sipas standardeve të Bashkimit Europian dhe ne do të vazhdojmë ta ngjisim Shqipërinë në majën ku ndodhet shtëpia e Europës së Bashkuar”.

Deklarata e kreut të qeverisë vjen në një moment kur debati për projektet e zhvillimit në zonën e Zvernecit dhe protestat kundër tyre ka qenë në qendër të vëmendjes publike, ndërsa votimi në Parlamentin Europian është interpretuar ndryshe nga palët e përfshira në këtë çështje.