Një aksident tragjik ka ndodhur pasditen e sotme në zonën e Lushnjës, ku një fermer ka humbur jetën gjatë punës me mjet bujqësor.

Viktima është identifikuar si Besnik Hasalla, 65 vjeç, banues në fshatin Garunjas, Njësia Administrative Ballagat.

Sipas informacioneve paraprake, 65-vjeçari po drejtonte një mjet bujqësor, kur për arsye ende të paqarta ka humbur kontrollin e tij dhe është zënë poshtë nga mjeti.

Si pasojë e dëmtimeve të marra, Hasalla ka ndërruar jetë në vendngjarje, pa mundur t’u mbijetojë plagëve.

Menjëherë pas njoftimit, në vendngjarje kanë mbërritur shërbimet e Policisë, të cilat kanë nisur veprimet hetimore për të zbardhur rrethanat e plota të aksidentit tragjik.

Grupi hetimor po punon për të përcaktuar shkaqet që çuan në humbjen e kontrollit të mjetit bujqësor dhe pasojat fatale për fermerin.