Dyshimet e SPAK se paratë e përfituara nga trafiku i narkotikëve janë investuar në sektorin e ndërtimit nuk mbështeten vetëm në analizat financiare dhe komunikimet e zbërthyera nga aplikacioni Sky ECC, por edhe në dëshmitë e bashkëpunëtorit të drejtësisë, Erion Alibej.

Sipas materialeve hetimore, Alibej ka dhënë detaje mbi raportet mes biznesmenit Ilir Shtufi dhe Artur Koçekut, duke pretenduar se ky i fundit ka luajtur një rol të rëndësishëm në stabilizimin financiar dhe zgjerimin e aktivitetit të Shtufit në fushën e ndërtimit.

Në dosjen hetimore thuhet:

“Sipas deklarimit të dëshmitarit të drejtësisë Erion Alibej, Ilir Shtufi njihej si biznesmen në fushën e ndërtimit, por në periudhën përpara lidhjes me Artur Koçekun ndodhej në vështirësi ekonomike. Ai deklaron se kishte mësuar nga bisedat mes tyre se Shtufi kishte borxhe të konsiderueshme, probleme me persona që i kishin vendosur gjoba dhe konflikte të krijuara nga shitja e të njëjtave apartamente apo dyqane më shumë se një herë. Sipas Alibejt, Artur Koçeku e ndihmoi me shuma të konsiderueshme monetare cash, duke i mundësuar shlyerjen e borxheve, mbylljen e konflikteve të krijuara dhe largimin e personave që ushtronin presion ndaj tij”.

Lidhur me elementët juridikë të çështjes, avokati Rezart Kthupi thekson se ekzistenca e një investimi nuk mjafton për të provuar pastrim parash.

“Jo domosdoshmërisht kemi një aktivitet kriminal që është i lidhur me një investim. Që të lidhet aktiviteti kriminal me investimin duhet të ketë një hetim që ky investim është prodhuar dhe ka gjeneruar nga aktiviteti kriminal. Sepse nëse nuk bëhet kjo lidhje midis investimit dhe aktivitetit kriminal, jo domosdoshmërisht do kemi pastrim të produkteve të veprës penale”, u shpreh ai.

Sipas deklarimeve të Alibejt, pas afrimit me Koçekun, aktiviteti ekonomik i Shtufit njohu një rritje të shpejtë.

“Erion Alibej deklaron se pas krijimit të lidhjes me Artur Koçekun, aktiviteti ekonomik i Ilir Shtufit njohu një rritje të menjëhershme. Sipas tij, fondet cash të siguruara nga Koçeku u përdorën për të stabilizuar situatën financiare të biznesmenit dhe për të zgjeruar investimet në sektorin e ndërtimit. Dëshmitari shprehet se Artur Koçeku sillej si një prej pronarëve realë të objekteve që ndërtoheshin nga Ilir Shtufi dhe se kjo ishte e njohur edhe nga persona të tjerë të rrethit të tyre shoqëror”.

Ndërkohë, avokati Dritan Jahja vlerëson se hetimi duhet të fokusohet në origjinën e pasurive dhe marrëdhëniet mes palëve të përfshira në transaksione.

“Është e rëndësishme për të evidentuar nëse janë fiktive apo jo këto kalime apo tjetërsime të pasurive, duke hetuar nëse personat që kanë qenë pjesë të transaksioneve kanë historik kriminal, janë të përfshirë në aktivitete kriminale, apo janë njerëz që realisht janë futur në blerjen e këtyre pasurive me qëllim ligjor për të kryer një aktivitet ekonomik dhe për ta zhvilluar. Por gjithmonë është hetimi ai që bën lidhjen e këtyre hallkave”, deklaroi ai.

Hetimet e SPAK për këtë dosje vijojnë, ndërsa deklarimet e bashkëpunëtorëve të drejtësisë po konsiderohen si një nga elementët kryesorë në verifikimin e rrjedhës së parave dhe investimeve të dyshuara.