Një ngjarje tragjike ka tronditur jugun e Francës, ku dy fëmijë të moshës 2 dhe 4 vjeç janë gjetur të pajetë brenda një automjeti, në rrethana që autoritetet dyshojnë se lidhen me temperaturat ekstreme që kanë përfshirë vendin.

Sipas autoriteteve franceze, temperaturat në zonë kanë arritur deri në 39 gradë Celsius, ndërsa Prokuroria e Carpentras ka bërë të ditur se ekspozimi ndaj nxehtësisë përbën pistën kryesore të hetimit.

Rrethanat e sakta të ngjarjes mbeten ende të paqarta. Sipas raportimeve të medias franceze “La Provence”, fëmijët dyshohet se kishin hyrë në automjet pa dijeninë e nënës së tyre 33-vjeçare dhe më pas mbetën të bllokuar brenda.

Ndërkohë, një burim policor i cituar nga “Le Parisien” ka deklaruar se nëna ka pretenduar se i kishte harruar fëmijët në makinë gjatë kohës që po bënte pazar.

Alarmi u dha pasi të miturit u gjetën në gjendje arresti kardiorespirator brenda një garazhi. Zjarrfikësit dhe ekipet e emergjencës ndërhynë menjëherë, por pavarësisht përpjekjeve të tyre, nuk arritën t’i rikthenin në jetë.

Autoritetet franceze kanë nisur hetimet për të zbardhur plotësisht shkaqet dhe rrethanat e kësaj tragjedie të rëndë, ndërsa pritet që ekspertizat dhe dëshmitë e mbledhura të ndihmojnë në sqarimin e dinamikës së ngjarjes.