Lëvizja Vetëvendosje ka mohuar përfshirjen e saj si subjekt politik në protestat që po zhvillohen prej ditësh në Shqipëri, duke theksuar se mbështetja e disa anëtarëve apo aktivistëve të saj është thjesht individuale.

Qëndrimi është bërë publik nga anëtari i Këshillit të Përgjithshëm të Lëvizjes Vetëvendosje, Enver Dugolli, i cili ka sqaruar se partia nuk ka asnjë rol organizativ apo politik në protestat që po mbahen në Tiranë.

“Vetëvendosje nuk ka të bëjë asgjë me këtë protestë, thjesht ne, disa aktivistë apo disa njerëz, eksponentë, solidarizohemi me kërkesat e drejta të qytetarëve, shqetësimet e tyre të drejta dhe me kaq mbaron. Nuk bëhet fjalë që Vetëvendosja nga Kosova apo nga cilado pjesë që ka ndonjë rol të veçantë në këtë protestë”, deklaroi Dugolli.

Ai reagoi gjithashtu ndaj komenteve të kryeministrit shqiptar Edi Rama për Lëvizjen Vetëvendosje, duke kërkuar që debati të fokusohet te kërkesat e protestuesve.

“Gjuha e përdorur nga Rama për Vetëvendosjen mendoj që nuk i bën nder as atij. Ai do të duhej që të komunikonte me qytetarët e revoltuar të Shqipërisë, të Tiranës, të gjitha qyteteve edhe të mërgatës, të jepte llogari dhe të reflektonte karshi kërkesave të tyre”, u shpreh Dugolli.

Sipas tij, përmendja e Vetëvendosjes në lidhje me protestat nuk është e nevojshme, pasi ato, sipas tij, burojnë nga pakënaqësitë e qytetarëve dhe jo nga ndikimi i ndonjë force politike nga Kosova.

“Nuk ka nevojë që të përzihet apo të merret ndonjë shembull i Vetëvendosjes apo ndonjë deklaratë e ndonjë zyrtari të Vetëvendosjes, sepse gjithçka ka të bëjë me solidarizimin me kërkesat që dalin nga kjo protestë dhe revolta e qytetarëve”, shtoi ai.

Në fund të reagimit të tij, Dugolli i bëri thirrje Ramës që të fokusohet te mesazhet që po përcjellin protestuesit.

“Kryeministri Rama do të duhej që të komunikonte me protestuesit, ata që për disa ditë radhazi po mbushin sheshin dhe rrugët e Tiranës. Nuk po e bën Vetëvendosja këtë protestë, por qytetarët e Shqipërisë dhe mërgata, të cilët po shprehin revoltën e tyre ndaj klasës politike aktuale”, deklaroi ai.