Ndryshime në drejtimin e Portit Detar të Sarandës. Sipas informacioneve paraprake, Admir Malaj është larguar nga detyra e drejtorit të portit, ndërsa në vend të tij është emëruar Gjergji Mërkuri.

Mërkuri është një emër i njohur në jetën publike dhe politike të Sarandës. Ai ka mbajtur më herët një sërë funksionesh drejtuese, mes tyre kryetar i Partisë Socialiste në Sarandë, drejtor i Doganës së Sarandës, drejtor i Turizmit pranë Bashkisë Sarandë, si dhe detyra në strukturat e Inspektoratit të Mjedisit për qarkun e Vlorës.

Largimi i Admir Malajt vjen pas një periudhe relativisht të shkurtër në krye të Portit të Sarandës. Ai u emërua në këtë detyrë në korrik të vitit 2025, pasi kishte drejtuar më parë Portin e Vlorës.

Deri tani nuk ka një reagim apo njoftim zyrtar të detajuar mbi arsyet e këtij ndryshimi, ndërsa pritet që institucionet përgjegjëse të japin më shumë informacion lidhur me vendimin dhe objektivat e administratës së re në Portin e Sarandës.