Mbi 500 pasagjerë që do të udhëtonin nga Bari drejt Durrësit u përballën me orë të tëra pritjeje pasi trageti GNV “Pegasus” pësoi një defekt teknik vetëm pak minuta para nisjes.

Sipas medieve italiane, trageti ishte planifikuar të nisej rreth orës 22:30 të së premtes nga moli 3 “San Vito” në portin e Barit. Megjithatë, kur procesi i imbarkimit ishte pothuajse drejt përfundimit, ekuipazhi njoftoi se anija nuk mund të lundronte për shkak të një problemi në motorë.

Si pasojë, më shumë se 500 pasagjerë dhe mbi 60 kamionë u detyruan të zbrisnin nga trageti, duke kaluar disa orë në pritje në port.

Rreth orës 02:00 të mëngjesit mbërriti trageti “Claudia” i kompanisë Adria Ferries, i cili mori në bord pasagjerët dhe automjetet, duke u nisur drejt Durrësit në orët e para të mëngjesit.

Megjithatë, shumë udhëtarë nuk mundën të përfitonin shërbimet për të cilat kishin paguar. Edhe pse kishin prerë bileta me kabina, ata u detyruan të udhëtonin në kuvertën e tragetit zëvendësues.

Ndërkohë, trageti “Pegasus” vijon të mbetet i ankoruar në portin e Barit, ku do t’i nënshtrohet kontrolleve teknike për të përcaktuar shkakun e defektit.