Portieri i Paraguajit, Orlando Gill, është kthyer në heroin e kombëtares së tij, pasi me dy pritje vendimtare të penalltive ndaj Gjermanisë i siguroi “Albirroja”-s kualifikimin në fazën e 1/8-ave të Kupës së Botës.

Në sfidën e zhvilluar në Boston, 26-vjeçari ndali goditjet e Kai Havertz dhe Nick Woltemade, duke vulosur eliminimin e Gjermanisë dhe suksesin më të madh të Paraguajit në këtë kompeticion që nga çerekfinalet e vitit 2010.

Por pas këtij triumfi fshihet një histori sakrifice. Katër vite më parë, Gill u detyrua të shiste rrobat, këpucët dhe madje edhe fanellën me të cilën kishte përfaqësuar Paraguajin në Kampionatin U-20 të Amerikës së Jugut, për të siguruar para për familjen. Djali i tij, Lautaro Daniel, kishte lindur me probleme shëndetësore dhe shpenzimet për trajtimin mjekësor ishin të papërballueshme.

Historia e tij u bë publike nga bashkëshortja, Melissa, e cila një vit më parë shkroi në rrjetet sociale:

“Kur lindi djali ynë, nuk kishim asgjë. Orlando shiste rrobat e klubit të tij të vjetër, këpucët, madje edhe bluzën e U-20. Lauti luftoi për jetën, por babai i tij ishte gjithmonë aty. Nuk ishte e lehtë dhe nuk do të jetë kurrë e lehtë, por me dashuri dhe sakrificë gjithçka është e mundur. Shpresoj që e gjithë bota të njohë zemrën e madhe që ke.”

Pas suksesit historik ndaj Gjermanisë, Gill ia dedikoi kualifikimin nipit të tij, i cili ndodhet i shtruar në spital, duke shprehur shpresën për shërimin e tij sa më të shpejtë.

Sot portier i San Lorenzo de Almagro, Gill nuk ishte gjithmonë gardian. Në fëmijëri ai luante si sulmues, por një trajner i vendosi një ultimatum: “Ose shkon në portë, ose qëndron në stol.” Vendimi për të veshur dorezat i ndryshoi përgjithmonë jetën.

Edhe pse gjithmonë ka pasur dëshirë të ekzekutojë penallti, talenti i tij më i madh rezultoi të ishte pritja e tyre. Dhe pikërisht falë dy ndërhyrjeve vendimtare ndaj Gjermanisë, ai shkroi një nga historitë më frymëzuese të këtij Botërori.