Presidenti i SHBA-së, Donald Trump, është shprehur me optimizëm të kujdesshëm për kontaktet që, sipas tij, pritet të zhvillohen në Doha të Katarit lidhur me programin bërthamor të Iranit. Megjithatë, Teherani vijon të mohojë se është planifikuar ndonjë takim negociues me Shtetet e Bashkuara.

Fillimisht përmes një postimi në platformën Truth Social dhe më pas në një prononcim për gazetarët në Shtëpinë e Bardhë, Trump deklaroi se të martën do të zhvillohet një takim në Doha.

“Do të ketë një takim për këtë nesër në Doha. Ata do të shkojnë në Katar, mendoj se janë larguar tashmë ose po përgatiten të largohen. Do të shohim si do të shkojë”, tha presidenti amerikan.

Trump i cilësoi bisedimet si “ndoshta të rëndësishme, ndoshta jo”, duke lënë të hapur rezultatin e tyre.

Presidenti amerikan pretendoi gjithashtu se SHBA-ja ka bërë përparim të madh në përpjekjet për të ndalur programin bërthamor iranian.

“Do të thoja se është fituar pothuajse ushtarakisht”, u shpreh ai, duke shtuar se objektivi kryesor i Uashingtonit mbetet që Irani të mos pajiset kurrë me armë bërthamore.

Trump deklaroi gjithashtu se, sipas vlerësimit të tij, Irani tashmë ka rënë dakord të mos zhvillojë kapacitete për armë bërthamore.

Ndërkohë, sipas dy zyrtarëve amerikanë të cituar nga CNN, i dërguari special i SHBA-së, Steve Witkoff, është nisur drejt Dohas. Ende nuk është e qartë nëse ai shoqërohet nga Jared Kushner, dhëndri i presidentit Trump.

Një zyrtar i lartë amerikan i tha CNN se bisedimet teknike për zbatimin e memorandumit të mirëkuptimit po vazhdojnë normalisht, pavarësisht tensioneve dhe shkëmbimeve të fundit të zjarrit në rajon.

Nga ana tjetër, Irani vazhdon të këmbëngulë se nuk është planifikuar asnjë takim negociues me SHBA-në në asnjë nivel gjatë ditëve në vijim. Autoritetet iraniane theksojnë se prioriteti i tyre mbetet zbatimi i memorandumit të mirëkuptimit dhe jo hapja e negociatave për një marrëveshje përfundimtare.

Qëndrimet e kundërta të Uashingtonit dhe Teheranit kanë krijuar pasiguri mbi natyrën dhe përmbajtjen e kontakteve që pritet të zhvillohen në Doha.