Kandidatja e djathtë Keiko Fujimori është shpallur zyrtarisht fituese e raundit të dytë të zgjedhjeve presidenciale në Peru, tri javë pas mbajtjes së votimeve, në një nga garat më të ngushta në historinë e vendit.

Sipas rezultateve përfundimtare të publikuara nga autoriteti zgjedhor, Fujimori siguroi 50.13% të votave, ndërsa rivali i saj, Roberto Sanchez, mori 49.86%. Diferenca mes tyre ishte më pak se 50 mijë vota nga mbi 18 milionë votues.

Fitorja e Keiko Fujimorit shënon rikthimin në pushtet të fujimorizmit, më shumë se dy dekada pas përfundimit të qeverisjes së babait të saj, Alberto Fujimori, i cili drejtoi Perun nga viti 1990 deri në vitin 2000.

Megjithatë, rezultati është kundërshtuar nga Roberto Sanchez, i cili ka refuzuar ta njohë humbjen. Ai pretendon se në procesin zgjedhor ka pasur parregullsi dhe ka kërkuar anulimin e votave të diasporës peruane, ndërsa ka paralajmëruar se do t’u drejtohet institucioneve ndërkombëtare për të kundërshtuar rezultatin.

Në fjalën e saj pas shpalljes së fitores, Keiko Fujimori pranoi se do të marrë drejtimin e një vendi të përçarë politikisht dhe premtoi të punojë për bashkëpunim.

“Peruja është e përçarë”, deklaroi ajo, duke shtuar se përgjegjësia e qeverisë së re do të jetë të dëgjojë të gjitha palët dhe të nxisë dialogun kombëtar.