Një aksident ajror është regjistruar gjatë operacionit për shuarjen e zjarreve në Greqi, ku dy helikopterë janë përplasur në ajër në zonën e Psathës.

Pamjet e publikuara nga vendngjarja tregojnë momentin e përplasjes së dy mjeteve ajrore, të cilat ishin angazhuar në operacionet për kontrollin e flakëve që kanë përfshirë zonën.

Sipas informacioneve paraprake nga mediat greke, të dy helikopterët ishin nisur nga aeroporti ushtarak i Elefsinës dhe po merrnin pjesë në misionin kundër zjarrit. Ekuipazhi i njërit prej helikopterëve ka arritur të mbijetojë dhe ka komunikuar me autoritetet, ndërsa për personat që ndodheshin në helikopterin tjetër ende nuk ka të dhëna të plota.

Në të dy mjetet ajrore ndodheshin nga dy persona në bord. Pilotët raportohet se ishin me origjinë rumune, ndërsa koordinatorët e misionit ishin grekë. Helikopterët ishin marrë me qira nga Shërbimi Zjarrfikës i Greqisë për përballimin e emergjencës së shkaktuar nga zjarret.

Menjëherë pas aksidentit, në vendngjarje janë dërguar katër autoambulanca të urgjencës dhe një njësi e lëvizshme mjekësore, ndërsa ekipet e kërkim-shpëtimit vijojnë operacionet.

Ngjarja vjen në një periudhë kur Greqia po përballet me disa vatra të mëdha zjarri, duke detyruar zjarrfikësit dhe mjetet ajrore të zhvillojnë operacione intensive për frenimin e përhapjes së flakëve.