Një aksident i rëndë rrugor ka marrë jetën e dy personave mëngjesin e sotëm në Greqi. Viktimat janë një nënë 43-vjeçare dhe djali i saj 24-vjeçar, të dy me origjinë shqiptare.
Ngjarja ka ndodhur rreth orës 07:30 në aksin rrugor Amfipoli–Drama, pranë zonës Paleokomi, në prefekturën e Serres. Sipas informacioneve paraprake, automjeti me të cilin udhëtonin është përplasur me një kamion, ndërsa rrethanat e aksidentit mbeten ende të paqarta.
Përplasja rezultoi fatale për nënën dhe djalin, të cilët humbën jetën në vendngjarje. Trupat e tyre janë transportuar në Spitalin e Përgjithshëm të Serres.
Ndërkohë, drejtuesi 57-vjeçar i kamionit ka mbetur i plagosur dhe është dërguar për mjekim në Spitalin e Përgjithshëm të Dramës. Ende nuk janë bërë të ditura detaje mbi gjendjen e tij shëndetësore.
Policia greke ka nisur hetimet për të zbardhur shkaqet dhe dinamikën e plotë të aksidentit tragjik.
