Tajlandë – Policia tajlandeze ka deklaruar se adoleshenti 14-vjeçar, i dyshuar si autor i të shtënave vdekjeprurëse në një shkollë jashtë Bangkokut, kishte parë përmbajtje të dhunshme në internet.

Sipas autoriteteve, 14-vjeçari dyshohet se vrau gjyshërit e tij në banesë përpara se të vriste gjashtë persona të tjerë në shkollë. Më pas, ngjarja përfundoi me vdekjen e vetë autorit.

Zëvendëskomisioneri i Rajonit 1 të Policisë Provinciale, Atthapol, tha se hetimet paraprake tregojnë se adoleshenti kishte shfaqur prej kohësh interes për përdorimin e armëve.

“Sipas intervistave me dëshmitarët, autori i krimit kishte filluar të tregonte interes për të studiuar përdorimin e armëve të zjarrit për njëfarë kohe, rreth një deri në dy vjet”, deklaroi Atthapol.

Ai bëri të ditur se deri tani policia kishte marrë në pyetje 17 dëshmitarë. Në mesin e provave të sekuestruara në vendet e ngjarjeve ishin një armë zjarri, gëzhoja, një thikë dhe një kompjuter personal.

“Pas shqyrtimit të kompjuterit, u zbulua se fëmija kishte parë përmbajtje që përfshinte dhunë”, tha zëvendëskomisioneri.

Megjithatë, ai theksoi se deri në këtë fazë nuk kishte prova që tregonin se adoleshenti ishte trajnuar ose praktikuar konkretisht qitjen me armë.

Policia bëri të ditur gjithashtu se një vit më parë, një mësues i kishte konfiskuar djalit një pushkë BB, një lloj arme me ajër, të cilën ai e merrte me vete në shkollë.

Adoleshenti kishte jetuar me gjyshërit për rreth 12 vjet, pasi prindërit e tij ishin ndarë.

Tajlanda forcon masat e sigurisë në shkolla

Pas ngjarjes, Ministria e Arsimit ka njoftuar se do të hartojë protokolle të reja sigurie gjatë tre muajve të ardhshëm.

Masat do të përfshijnë ekzaminime të shëndetit mendor dhe krijimin e një sistemi për referimin e personave në rrezik te specialistët.

Gjithashtu parashikohen trajnime për planet e reagimit ndaj emergjencave, masa kundër ngacmimit në shkolla dhe kontrolle më të mira për të parandaluar futjen e sendeve të rrezikshme në ambientet shkollore.

Autoritetet vijojnë hetimet për të përcaktuar plotësisht rrethanat dhe faktorët që çuan në ngjarjen tragjike.