Agjencia gjysmëzyrtare e lajmeve Mehr e Iranit ka publikuar në një platformë të mediave sociale një video të Mojtaba Khameneit, i cili nuk është parë në publik që prej zgjedhjes së tij si udhëheqës suprem në fillim të marsit.

Videoja, e cila nuk mban datë, u publikua në Telegram të dielën dhe tregon Khamenein duke biseduar me disa persona, shkruan Sky News.

Agjencia Mehr nuk ka bërë të ditur se kur dhe ku janë regjistruar pamjet, ndërsa nuk ka identifikuar as personat që ndodhen pranë tij.

Publikimi i videos vjen pas disa pretendimeve në rrjetet sociale dhe në raportime mediatike se Mojtaba Khamenei ishte shtruar në spital dhe se gjendja e tij shëndetësore ishte e rëndë. Deri tani, këto pretendime nuk janë konfirmuar në mënyrë të pavarur.

Mojtaba Khamenei pasoi të atin, Ajatollah Ali Khamenei, si udhëheqës suprem i Iranit, pasi 86-vjeçari u vra në një sulm ajror më 28 shkurt, në ditën e parë të konfliktit me SHBA-në.