Një 20-vjeçar është arrestuar në Tiranë, pasi dyshohet se ka shkelur masën e sigurisë “Arrest në shtëpi”, të vendosur ndaj tij për vjedhje, dhe brenda vetëm një jave ka kryer edhe 8 vjedhje të tjera.

Policia e Tiranës bëri të ditur se operacioni i koduar “Multiple” u finalizua pas hetimeve të nisura mbi kallëzimet e disa shtetasve për vjedhje në subjektet që kishin në pronësi ose administrim.

Në pranga është vënë shtetasi O. H., 20 vjeç, i cili dyshohet se gjatë periudhës 5–13 gusht 2026 ka vjedhur para dhe produkte në tetë subjekte të ndryshme.

Gjatë verifikimeve, efektivët kanë konstatuar se i riu ishte nën masën e sigurisë “Arrest në shtëpi”, të caktuar më herët për të njëjtën veprimtari kriminale.

Policia thotë se hetimet vijojnë për të zbardhur nëse 20-vjeçari është autor edhe i vjedhjeve të tjera të kryera në Tiranë.

Materialet procedurale i janë referuar Prokurorisë së Tiranës për veprime të mëtejshme.