Tom Holland raportohet se mund të përfitojë më shumë se 100 milionë dollarë nga filmi “Spider-Man: Brand New Day”, falë një marrëveshjeje që përfshin pagën bazë dhe bonuse të lidhura me suksesin financiar të filmit.

Sipas burimeve të cituara nga The Wrap, aktori ka marrë një pagë bazë prej të paktën 20 milionë dollarësh për rikthimin në rolin e Peter Parkerit. Kjo shumë është rreth 10 milionë dollarë më e lartë se pagesa që ai mori për “Spider-Man: No Way Home” në vitin 2021.

Përveç pagës bazë, Holland thuhet se ka siguruar edhe një marrëveshje për përfitime të lidhura me performancën e filmit dhe të ardhurat nga arkëtimet në kinema.

Sipas raportimeve, këto bonuse mund të bëjnë që të ardhurat totale të aktorit të kalojnë 100 milionë dollarët.

Një tjetër detaj i marrëveshjes është se bonusi i Holland nuk ka një kufi maksimal. Kjo do të thotë se shuma përfundimtare mund të rritet më tej në varësi të suksesit financiar të filmit.

“Ai do të fitojë të paktën 100 milionë dollarë”, ka deklaruar një burim për mediat, duke iu referuar pagesës totale që aktori mund të marrë.

Filmi, me regji të Destin Daniel Cretton, ka shënuar rezultate të forta në arkëtime dhe është kthyer në një tjetër sukses për ekskluzivitetin “Spider-Man”.

Nëse ritmi i të ardhurave vijon, marrëveshja mund ta bëjë Tom Holland një nga aktorët më të paguar për një rol të vetëm në një film superhero.