Kryeministri Edi Rama ka folur për prioritetet e qeverisë pas takimit me anëtarët e Këshillit të Ministrave dhe drejtuesit e agjencive në Pogradec.

Në një komunikim live me ndjekësit në Facebook, Rama u ndal te disa prej çështjeve që prekin drejtpërdrejt qytetarët, përfshirë shëndetësinë, arsimin, cilësinë e jetës dhe çmimet e ushqimeve bazë.

Sa i përket çmimeve, kryeministri bëri me dije se qeveria po përgatit një plan që synon të rrisë transparencën për çmimet që qytetarët paguajnë në treg.

Rama sqaroi se qeveria nuk synon të përcaktojë çmimet në një sistem të lirë tregu, por të krijojë një mekanizëm që t’u mundësojë qytetarëve të kenë më shumë informacion mbi çmimet e produkteve bazë.

“Kemi folur për çmimet natyrisht. Kemi një plan për këtë. Jetojmë në një sistem ku nuk kemi asnjë eksperiencë, asnjë praktikë të përcaktimit të çmimeve nga shteti, kjo është e pamundur. Por kemi një plan për të bërë transparencë për qytetarin lidhur me çmimet e ushqimeve bazë”, u shpreh Kryeministri.

Sipas Ramës, plani do të prezantohet pasi të përfundojë konsolidimi i tij dhe të përcaktohen të gjitha detajet.

“Plan të cilin do ta prezantojmë më herët sesa vonë, në momentin kur do të jetë i konsoliduar plotësisht me detaje”, theksoi Rama.