Një ngjarje e rëndë ka tronditur Spanjën, ku policia po heton vdekjen e një çifti me origjinë irlandeze, trupat e të cilëve u gjetën në një vaskë hidromasazhi nga dy fëmijët e tyre, 14 dhe 16 vjeç.

Çifti jetonte në lagjen luksoze Cap Blanc, në Valencia. Sipas raportimeve, dy adoleshentët zbuluan trupat e pajetë të prindërve dhe më pas iu drejtuan pronarit të banesës për ndihmë.

Pronari njoftoi menjëherë shërbimet e emergjencës, të cilat mbërritën në banesë.

Autoritetet spanjolle kanë nisur hetimet për të përcaktuar rrethanat e vdekjes. Deri më tani, po shqyrtohen të gjitha pistat, përfshirë mundësinë e një aksidenti, por edhe atë të një ngjarjeje kriminale, raporton “Daily Mail”.

Në kuadër të hetimit, policia ka marrë edhe mostra nga uji i vaskës së hidromasazhit. Mostrat do t’i nënshtrohen analizave laboratorike, të cilat pritet të ndihmojnë në përcaktimin e shkaqeve dhe rrethanave të vdekjes.

Ndërkohë, dy fëmijët e çiftit po marrin ndihmë psikologjike pas ngjarjes së rëndë.

Një i afërm i tyre, xhaxhai, pritet të udhëtojë drejt Spanjës për t’u kujdesur për dy adoleshentët dhe për të marrë përsipër kujdestarinë e tyre.

Hetimet vijojnë, ndërsa autoritetet spanjolle pritet të japin më shumë informacion pas përfundimit të analizave dhe ekspertizave.