Port Moresby — Një ngjarje e rëndë dhe me bilanc tragjik ka tronditur Parkun e Aventurave në zonën e Port Moresby, Papua Guineja e Re, ku një punonjës ka humbur jetën pas një sulmi fatal nga një krokodil për të cilin po kujdesej prej dy vitesh.
Sipas dëshmitarëve okularë që folën për mediat, ngjarja e frikshme ndodhi të shtunën gjatë kohës kur kujdestari u afrua pranë gardhit të zvarranikut për t’i dërguar një pulë. Në atë moment, krokodili e sulmoi menjëherë, e kapi nga këmbët me nofullat e tij të fuqishme dhe u përpoq ta tërhiqte drejt akuariumit duke kryer manovrën fatale të njohur si “rrotullimi i vdekjes”.
I mbërthyer nga nofullat e kafshës për rreth një orë, punonjësi në momentet më të vështira të jetës së tij dëgjua të thoshte fjalët prekëse:
> “Nuk kam bërë asgjë të gabuar.”
>
Oficerët e qëlluan 10 herë zvarranikun për ta liruar
Përpjekjet për shpëtimin e tij rezultuan shumë të vështira. Oficerët e sigurisë u detyruan ta qëllonin krokodilin me armë zjarri më shumë se 10 herë për të bërë të mundur lirimin e trupit të punonjësit nga mbërthimi fatal.
I dëmtuar rëndë, burri u dërgua me urgjencë në spital për të marrë ndihmën mjekësore, mirëpo nuk mundi t’u mbijetonte plagëve të rënda dhe ndërroi jetë të dielën në mëngjes.
Pikëpyetje të mëdha mbi sigurinë në park
Kjo tragjedi ka ngritur shqetësime të mëdha mbi protokollet e sigurisë dhe trajtimin e kafshëve të egra në këtë park aventurash. Pamjet e publikuara nga muajt e mëparshëm tregojnë se punonjësit u afroheshin krokodilëve në distancë shumë të afërt për të zhvilluar demonstrime ushqyerjeje përpara vizitorëve, duke ekspozuar kështu stafin ndaj rreziqeve extreme. Lidhja mes këtyre praktikave të shfaqjeve publike dhe ngjarjes fatale mbetet tashmë në qendër të kritikave.