Tiranë — Kryeministri dhe kryetari i Partisë Socialiste, Edi Rama, ka tronditur ujërat brenda kampit të tij politik përmes një deklarate të prerë gjatë një interviste, ku ka bërë të qartë se nuk ka ndërmend të përcaktojë asnjë trashëgimtar politik. Deklarata i pret shpresat të gjithë atyre që bëjnë luftëra të nëndheshme brenda PS-së për t’i zënë vendin, duke neutralizuar kështu rivalitetet e brendshme.
I pyetur mbi të ardhmen e drejtimit të partisë, Rama shprehi hapur filozofinë e tij për pushtetin dhe pasardhësin:
> “Ai që të sfidon dhe bëhet pasardhës, ai duhet të të vrasë. Unë personalisht nuk kam ndërmend të zgjedh pasardhës. Në momentin që unë do të kaloj pragun e asaj dere, do të shpëtoni nga unë”, deklaroi Rama.
>
Neutralizimi i rivalëve dhe strategjia e kontrollit
Deklarata e kreut të mazhorancës vjen pas eliminimit politik të disa prej figurave që synonin fronin e tij brenda partisë — si Saimir Tahiri, Erion Veliaj dhe së fundmi Belinda Balluku. Përmes këtij qëndrimi, Rama paralajmëron se nuk kërkon të lërë një “testament politik”, duke aplikuar strategjinë e mosdorëzimit të pushtetit pa një përballje të drejtpërdrejtë.
Duke pasur parasysh edhe eksperiencën e tij historike me Fatos Nanon, kreu i PS-së refuzon të përcjellë një kulturë të caktimit të trashëgimtarëve. Përmes këtij hapi, ai shmang të ashtuquajturin “efekt të udhëheqësit pa fuqi” (lame duck) — një dukuri ku caktimi i një pasardhësi orienton besnikërinë dhe interesat e strukturave drejt figurës së re, duke zbehur autoritetin e liderit aktual.
Provë ekzistenciale për Partinë Socialiste
Strategjia e refuzimit të një pasardhësi konsolidon kontrollin e tij absolut mbi strukturat e partisë për momentin. Megjithatë, kjo filozofi e lë Partinë Socialiste përballë një sprove të ashpër ekzistenciale dhe një krize të thellë drejtimi në të ardhmen, pasi pa një udhëheqës që ka forcën ta sfidojë e ta “vrasë” politikisht paraardhësin, largimi i njeriut që vendoste për çdo gjë rrezikon ta lërë forcën më të madhe politike në vend pa një orientim të qartë.