Prishtinë — Partia Demokratike e Kosovës (PDK) do të jetë e pranishme në seancën konstituive të Kuvendit të Kosovës, e cila është thirrur zyrtarisht për t’u mbajtur më 9 shtator.
Lajmi është bërë me dije nga kryetari i PDK-së, Bedri Hamza, pas mbledhjes së përbashkët të Kryesisë dhe Grupit Parlamentar. Hamza kërkoi që Kuvendi të konstituohet pa vonesa të mëtejshme, duke nënvizuar se tashmë është shkelur afati kushtetues dhe aktgjykimi i Gjykatës Kushtetuese që përcakton konstituimin brenda 30 ditësh nga certifikimi i rezultateve.
> “Ne kemi insistuar që me u konstitu Kuvendi për shkak se, edhe pse është shkelur afati kushtetues, për me pasur veprime të tjera, Kuvendi duhet të jetë i konstituar”, deklaroi Hamza.
>
Shqetësimet për manovra të reja politike
Kreu i PDK-së shprehu dyshime se thirrja e seancës më 9 shtator mund të përdoret nga palët e tjera si një manovër për të shtyrë më tej procesin:
> “Presim që kjo mos të jetë një llogaritje e radhës, politik, që ftohet seanca me datën 9, por Kuvendi mos të konstituohet”, tha ai.
>
Në përfundim të fjalës së tij, Hamza e bëri të qartë se partia e tij nuk mban asnjë përgjegjësi për bllokadën e deritashme institucionale, duke deklaruar:
> “Ne nuk e thërrasim seancën. Ne nuk kemi përgjegjësi pse deri tash nuk është konstituar Kuvendi.”
>