Inteligjenca artificiale Claude, e zhvilluar nga kompania amerikane Anthropic, po përdoret ose po tentohet të përdoret nga shtete dhe grupe të ndryshme për qëllime ushtarake, propagandistike dhe kibernetike.

Sipas një raporti të ri të Anthropic, Rusia është përpjekur të përdorë Claude për zhvillimin e teknologjisë së navigimit të tufave të dronëve të përdorur në luftën kundër Ukrainës. Në raste të tjera, Kina ka tentuar ta përdorë teknologjinë për luftën elektronike, ndërsa në Jemen është përdorur për sisteme udhëzimi të raketave.

Raporti përmend gjashtë raste ku Claude është përdorur për zhvillimin ose përmirësimin e armëve, përfshirë dronë, raketa dhe municione të drejtuara.

Anthropic paralajmëron se rreziqet nga keqpërdorimi i inteligjencës artificiale nuk janë më thjesht skenarë hipotetikë. Sipas kompanisë, AI po përdoret tashmë për aktivitete konkrete si sulmet kibernetike, propaganda, mashtrimet dhe mbikëqyrja.

Rriten përpjekjet për keqpërdorimin e AI

Anthropic thotë se gjatë vitit 2026 ka konstatuar një rritje të fortë të përpjekjeve për të abuzuar me Claude.

Kompania i ka ndarë rastet në disa kategori, duke përfshirë përdorimin e AI për armë, dezinformim, ndërhyrje politike, mbikëqyrje, sulme kibernetike, mashtrime financiare dhe kërkime biologjike me potencial të rrezikshëm.

Një nga shqetësimet kryesore është përdorimi i teknologjisë për propagandë dhe ndërhyrje në procese zgjedhore.

Sipas raportit, aktorë të lidhur me Rusinë, Iranin dhe vende të tjera kanë përdorur Claude për të krijuar dhe shpërndarë përmbajtje politike në gjuhë të ndryshme. Në disa raste, janë organizuar fushata që synonin ndikimin te opinioni publik ose manipulimin e proceseve zgjedhore.

Kina dhe mbikëqyrja e disidentëve

Raporti përmend gjithashtu përpjekje të lidhura me Kinën për përdorimin e inteligjencës artificiale në mbikëqyrjen e disidentëve dhe pakicave, përfshirë ujgurët.

Në raste të tjera, teknologjia është përdorur për monitorimin e komunikimeve dhe mbledhjen e informacionit.

Në fushën e sigurisë kibernetike, Anthropic thotë se Claude është përdorur në përpjekje për të depërtuar në sistemet mbrojtëse të rrjeteve kompjuterike, për vjedhje të të dhënave dhe për spiunazh.

Raporti përmend edhe sulme të lidhura me Rusinë ndaj institucioneve ukrainase, si dhe tentativa që kanë prekur qeveri dhe interesa diplomatike e të mbrojtjes në Evropë dhe në SHBA.

Shqetësime edhe për biologjinë

Një tjetër fushë që ka ngritur shqetësime është përdorimi i AI në kërkimet biologjike.

Anthropic thekson se nuk ka gjetur prova të qarta se bioterroristët po përdorin Claude për zhvillimin e armëve biologjike. Megjithatë, kompania thotë se po heton disa raste që kanë ngritur dyshime.

Raporti nënvizon kështu një sfidë gjithnjë e më të madhe për kompanitë e inteligjencës artificiale: të parandalojnë që teknologjitë e tyre të përdoren për qëllime ushtarake, propagandistike, kriminale apo të tjera që mund të paraqesin rrezik për sigurinë.