Një ngjarje tragjike ka tronditur Partinicon, pranë Palermos në Itali, ku një 37-vjeçare dhe djali i saj 21-vjeçar u gjetën të vdekur brenda garazhit të banesës së tyre. Dyshimi kryesor i hetuesve është se ata mund të jenë asfiksuar nga përqendrimi i lartë i dioksidit të karbonit në një hapësirë të mbyllur.

Viktimat janë identifikuar si Rosalia La Manna, 37 vjeçe, dhe djali i saj, Vincenzo Troia, 21 vjeç.

Sipas rindërtimit paraprak, i riu kishte zbritur në një prej rezervuarëve nëntokësorë të ndodhur në garazh për të marrë disa rrjeta që përdoreshin për mbledhjen e ullinjve. Dyshohet se brenda hapësirës kishte mungesë oksigjeni dhe një përqendrim të lartë të dioksidit të karbonit, duke bërë që 21-vjeçari të humbte ndjenjat dhe të ndërronte jetë.

Nëna e tij, e alarmuar pasi nuk e pa të dilte nga rezervuari, shkoi për ta kontrolluar. Sipas hipotezës së hetuesve, edhe ajo u ekspozua ndaj gazit dhe humbi jetën.

Në vendngjarje ndërhynë ekipet e emergjencës, përfshirë specialistët e njësisë NBC, të pajisur me bombola oksigjeni për shkak të rrezikut nga prania e gazrave toksikë. Zjarrfikësit konstatuan se në rezervuarë nuk kishte nivele të mjaftueshme oksigjeni për mbijetesë.

Karabinierët kanë nisur hetimet për zbardhjen e plotë të rrethanave, ndërsa shkaku përfundimtar i vdekjeve pritet të përcaktohet pas përfundimit të verifikimeve teknike.

Kryebashkiaku i Partinicos, Pietro Rao, shprehu ngushëllimet për familjen dhe komunitetin, duke e cilësuar ngjarjen një tragjedi të rëndë. Ai theksoi se hetimet do të ndihmojnë në përcaktimin e saktë të shkaqeve të ngjarjes.