Ashtu siç ishte paralajmëruar, Kuvendi i Shqipërisë do të drejtohet nga një grua.

Kryeministri Edi Rama deklaroi në Asamblenë e PS se në vend të Gramoz Ruçit do të jetë Lindita Nikolla, ish-ministre e Arsimit.

“Shembull i padyshimtë në krye të çdo detyre, një shoqe e mirë dhe një politikane karriere, që është karakterizuar nga dëshira për dialog të edukuar me të tjerët”, tha Rama.

Në një prononcim nga Pallati i Kongreseve për mediat, Nikolla thotë se  do të punojë për të krijuar klimë pozitive dhe hapësira për opozitën në Kuvend.

“Më shumë përgjegjshmëri për të mësuar më të mirën e mundshme në detyrën e arbitres së veprimtarisë së Parlamentit. Duke krijuar hapësirat e nevojshme së pari opozitës, patjetër, për te shprehur idetë dhe mendimet e saj. Duke respektuar gjithçka që ai tempull i demokracisë meriton nga rregullorja, etika dhe gjithë momentet e tjera. Sot ajo që unë mund të them, është fakti që jam e mbushur plot, mendje e zemër, me një përgjegjshmëri të shtuar për të përmbushur maksimalisht të gjiithë besimin dhe pritshmëritë që PS dhe kryetari PS z. Edi Rama pati në këtë përzgjedhje”, tha Nikolla.