Kryeministri Edi Rama ka nisur sot vizitën zyrtare në Kosovë, ku është pritur në një ceremoni nga homologu i tij, Albin Kurti, në sheshin “Skënderbeu” në Prishtinë.

Pas këndimit të himneve të të dyja shteteve, dy kryeministrat u takuan me delegacionet përkatëse.

Pas ceremonisë zyrtare, dy kryeministrat kanë shtrënguar duart dhe i janë drejtuar Kryeministrisë, ku kanë nisur takimin, ndërsa më pas pritet të kenë konferencë të përbashkët për media.

Në një njoftim nga zyra e kryeministrit Albin Kurti, ndër të tjera tregohet dhe agjenda e takimit mes dy krerëve të qeverisë.

“Kryeministri i Republikës së Kosovës, Albin Kurti, nesër, më 27 shtator 2021, duke filluar nga ora 08:50, pret me ceremoni shtetërore në Sheshin “Skënderbeu”, Kryeministrin e Republikës së Shqipërisë, Edi Rama, dhe anëtarë të kabinetit qeveritar të Shqipërisë. Pas takimit, Kryeministri i Republikës së Kosovës, Albin
Kurti dhe Kryeministri i Republikës së Shqipërisë, Edi Rama, mbajnë konferencë për media në ora 10:20”, shkruajnë mediat në Kosovë.

Vizitës së kryeministrit Rama ne Prishtinë i kanë paraprirë zhvillimet në veri të Kosovës, pjesë kjo në të cilën Qeveria Kurti ka dërguar Njësitin Special që të menaxhojë situatën pas tensioneve të protestuesve serbë në pikat kufitare Jarinje dhe Bërnjak.