Gjykata ka pranuar kërkesën e Prokurorisë duke vendosur “Detyrim me paraqitje” për Besnik Balani dhe Astrit Cara dy të akuzuarit për djegien e flamurit serb ditën e protestës të thirrur nga ish-Kryeministri Sali Berisha.

Pas vendimit të Gjykatës, kanë reaguar Klevis Balliu dhe Ndriçim Gjata të cilët e kanë konsideruar një vendim dhe arrestim politik të “urdhëruar” sipas tyre nga Edi Rama.

Klevis Balliu:
“Edi Rama për tu qartësuar juve, ka bërë një status në Facebook duke thënë se ata që dogjën flamurin duhet të arrestohen. Sa për dijeni tuaj personat në Serbi nuk janë arrestuar, kurse policia shqiptare me urdhër politik të Ramës i ka arrestuar. Në 2012 komisioni e ka hequr nga kodi penal për shkelje penale djegien e flamurit. Ju tregoj një rast të ngjashëm, në SHBA Gjykata ka vendosur që djegia e flamurit është një pjesë e shprehjes së lirisë së individit, nuk është vepër penale. Kjo ishte qokë e Ramovicit që i bën qejfin Vucicit, asnjë nuk do ta ndalojë revolucionin e shqiptarëve”.

Ndriçim Gjata:
“Prokuroria dhe Gjykata s’ka asnjë provë asnjë rrezikshmëri të këtyre persona. Këta janë akuzuar për nxitje të urrejtjes, djegia e flamurit nuk është vepër penale. As për nxitje urrejtje s’kanë asnjë provë, nuk është problemi që u dogj flamuri serb, e mbani mend atë ndeshje në Beograd sa flamuj u dogjën dhe askush nuk u dënua. Asnjë nuk është arrestuar në Serbi, Edi Rama gënjen, sapo Rama bëri statusin në Faceboook menjëherë policia i arrestoi”