Policia ka vënë në pranga dy shoferët që shkaktuan aksidentin tragjik të së martës në Durrës.
Sipas njoftimit zyrtar të policisë shoferi i “Ford-it” 22 vjeçari Xhoni Muço ka qenë i dehur në timon dhe është përplasur me motorçikletën e drejtuar nga Sokol Kovaçi, ku në të ishin edhe 4 fëmijë të tij.
Nga përplasja e fortë ndërruan jetën dy prej fëmijëve, njëri në vend (15 vjeçari Franci Kovaçi) ndërsa Danjel Habibi 10 vjeç vdiq pas disa orësh në spital.
Dy djemte qe udhëtonin mbi koshin e improvizuar kane fluturuar dhjetëra metra larg.
Mësohet se Muço po lëvizte nga Ura e Dajlanit në drejtim të Shkozetit dhe rreth orës 22:40 ka përplasur motorçikletë pa targa, të modifikuar me karrocë, ku gjendeshin të miturit.
Policia shtoi se 22-vjeçari i është bërë testi i alkoolit me DRAGER ku ka rezultuar në gjendje të dehur. Po kështu i dehur ka rezultuar edhe drejtuesi i motocliketës Sokol Kovaci, i cili humbi të birin në këtë aksident.
Njoftimi i Policisë:
Specialistët e Qarkullimit Rrugor në DVP Durrës arrestuan në flagrancë shtetasit Xh. M., 22 vjeç dhe S. K., 47 vjeç, të dy banues Durrës, pasi më datë 08.02.2022, në mbrëmje, në rrugën “Bajram Tusha”, në lagjen nr.14, Durrës, 22-vjeçari, duke drejtuar mjetin në gjëndje të dehur është përplasur me një motomjet që drejtohej në gjendje të dehur nga 47-vjeçari dhe si pasojë ka humbur jetën në vendngjarje shtetasi F. K. dhe u dëmtua rëndë shtetasi D. H., i cili ka humbur jetën më vonë në spital. Gjithashtu, si pasojë e aksidentit kanë mbetur të dëmtuar shtetasit D. Q. dhe M. A., të cilët ndodhen jashtë rrezikut për jetën.
