Mediat greke bëjnë me dije se qytetarët grekë po tregojnë mbështetjen e tyre praktike për Kievin duke telefonuar ambasadën e Ukrainës në Athinë dhe duke kërkuar informacion se si mund t’i bashkohen ushtrisë ukrainase.
Këto kërkesa vijnë si nga ukrainasit që jetojnë në Greqi ashtu edhe nga grekët të cilët i përgjigjen thirrjes së presidentit Zelensky për formimin e një njësie legjioni të të huajve për të luftuar kundër forcave ruse.
“Ne kemi disa telefonata nga njerëz që duan të dalin vullnetarë për të ndihmuar ushtrinë dhe popullin ukrainas,” tha një përfaqësues i ambasadës ukrainase në Athinë për ProtoThema .
Sipas përfaqësuesit të ambasadës, njerëzit që po telefonojnë po kërkojnë të zbulojnë se çfarë kërkohet për të shkuar për të luftuar kundër forcave ruse.
“Për momentin nuk janë mijëra kërkesa, por dhjetëra të tilla. Ne i njoftojmë të gjithë që të dërgojnë kërkesën e tyre me e-mail me detajet e plotësuara”, shtoi përfaqësuesi.
Procedura e ndjekur është mjaft e rreptë me një kontroll të imtësishëm të personit që dëshiron të shkojë të luftojë.
Kujtojmë gjithashtu se zëvendësministrja e Mbrojtjes së Ukrainës, Hanna Maliar, deklaroi përmes një postimi në facebook të hënën se mijëra njerëz ishin paraqitur për tu bërë pjesë e ushtrisë, që pas apelit të presidentit ukrainas Volodymyr Zelensky.