Është arrestuar tre ditë më parë në Vlorë i ‘famshmi’ Helidon Gjikoka, i shpallur në kërkim prej dy vitesh, pasi Gjykata e Tiranës caktoi për të masën e sigurisë “arrest në burg”, me kërkesë të Prokurorisë.
Mësohet se pas arrestimit, Gjykata e Vlorës ka vendosur masën e arrestit me burg për Gjikokën, ndërsa prokuroria do të vijojë hetimet edhe për 4 muaj. Helidon Gjikoka akuzohet se ka përvetësuar me anë të mashtrimit dhe falsifikimeve kompleksin ‘Ambel’ në Dhërmi, në pronësi të kushëririt të tij Ilir Koka.
Në shtator të vitit 2020, Prokuroria e Tiranës depozitoi në gjykatë kërkesën për arrestimin e Helidon Gjikokës, por Gjikoka mundi të largohej nga Shqipëria, duke i shpëtuar prangave.
Disa ditë më parë, gjyqtari i Gjykatës së shkallës së parë Vlorë Enkel Peza, në vijim të procedimit la në fuqi akuzën për falsikimin e dokumenteve të kompleksit ‘Ambel’ në Dhërmi.
Më poshtë komunikata për shtyp e gjykatës.
Deklaratë
Gjykata e Rrethit Gjyqësor Vlorë, pasi është njohur me informacionin e publikuar ne mediat
serioze dhe ato të portaleve te tjera online, nuk mbeshtet aspak lajmet e rreme të dala në rrugë jozyrtare te cilat qëllimisht kanë si synim, të disinformojnë publikun dhe të cënojnë besimin e publikut për sistemin e drejtësisë.
Përgënjeshtrojmë lajmin se nga ana e Gjykatës së Rrethit Gjyqësor Vlore është lënë i lirë shtetasi Helidon Gjikoka, pasi nuk është informacion i vërtetë.
Dje, në datë 12.03.2022 nga ana e Gjyqtarit Enkel Peza, në zbatim të neneve 228, 229, 238, 248 e vijues te Kodit te Procedurës Penale, është vendosur me vendim e datës 12.03.2022 për vazhdimin e masës së sigurimit “Arrest me burg”, për të pandehurin Helidon Gjikoka.
Lajme të tilla jo të vërteta shkelin parimet e drejtesisë, duke denigruar figurën e magjistratëve dhe gjykatës, cënojnë magjistratët në dhënien e drejtësisë dhe besimin e publikut për sistemin e drejtësisë.
Ftojmë mediat dhe portalet serioze të përgënjeshtrojnë lajmin dhe të mos bien “pre” e
informacioneve qëllimisht të rreme.
Gjykata e Rrethit Gjyqësor Vlorë ka qënë dhe do vazhdojë të jetë e hapur ndaj çdo gazetari, media, apo institucione të tjera, në dhënien e informacionit zyrtar dhe të vërtetë, sikurse kemi qënë transparent për çdo vendim të dhënë nga gjykata jonë, të kërkuar nga media apo subjekte të tjera të interesuara, të cilat kanë përbërë interes publik.
Gjykata e Rrethit Gjyqësor Vlorë.
