Disa luftëtarë paraushtarakë sirianë thonë se janë të gatshëm të vendosen në Ukrainë për të luftuar në mbështetje të aleatit të tyre, Rusisë. Por sipas Reuters ata ende nuk kanë marrë udhëzime për të shkuar aty.

Nabil Abdallah, një komandant i Forcave të Mbrojtjes Kombëtare paraushtarake (NDF), tha se ishte gati të përdorte ekspertizën në luftimet urbane të fituara gjatë luftës siriane për të ndihmuar Rusinë.

“Sapo të marrim udhëzime nga udhëheqja siriane dhe ruse, ne do të luftojmë në këtë luftë të drejtë”, tha Abdallah më 14 mars, katër ditë pasi Presidenti Vladimir Putin dha dritën jeshile për 16,000 vullnetarë nga Lindja e Mesme për t’u vendosur në Ukrainë.

“Ne nuk i frikësohemi kësaj lufte dhe jemi gati për të sapo të vijnë udhëzimet për të shkuar dhe për t’u bashkuar. Ne do t’u tregojmë atyre atë që ata nuk e panë kurrë … Ne do të bëjmë luftëra në rrugë dhe të  zbatojmë taktikat që kemi fituar gjatë betejave që mposhtën terroristët në Siri”, shtoi ai.

Ministria e Mbrojtjes ruse, por edhe ajo siriane nuk dhanë asnjë përgjigje pas interesimit të Reuters se kur mund lëshohet udhëzimi për lejimin e paraushtarakëve sirianë në Ukrainë, ose nëse ka luftëtarë të tillë të cilët luftojnë tashmë përkrahë forcave ruse.